كثر الكلام اللي من الخاطر طواه الحنين
لحظات انا زكيتها ولحظات ذكيتها ،،
حنا على وجه البسيطه كلنا عابرين ،،
وارواحنا المتفاوته تمشي لتوقيتها
راحت ليالينا وانا ساكت مع الساكتين
حنّت عليّ نفسي من الدنيا وحنيتها ،،
يا ساهرين الليل شرهتكم على النايمين
انا مشاريهي على صدري وملّيتها
الله على الذكرى تسولفلي عن الغايبين
( والله على ايامٍ مضت لي ما تناسيتها )
والله على ذاك الشعور المختفي له سنين
مراحلٍ فالعمر ،،، خلتني وخليتها
انمشي الايام والساعات ،، متأملين !!
ولو بـ ايدي الايام ترجع ،، كان رديتها
الوقت متغيّر ،، وحتى الربع متغيرين
من يوم ماشفت الدوانيه ، طفى ليتها
#بداح_الشويّب
