مجلة معكاز شعر الالكترونيه الثقافيه المنصة الالكترونية الثقافية الفريدة من نوعها تعني بنشر الشعر والأدب القديم والحديث في الساحة الشعبية الخليجية والعربية .
مقالات مشابهة
الشاعر : عبدالله بن زويبن العربي
تاريخ الميلاد 1957
الوفاة 2016 الرياض
بلد الاقامه سعودي
سبب الوفاة مرض
ورث الشاعر موهبة النظم من والده منذ أن كان في الخامسة عشرة من عمره، وهو من أسرة عرف عنها الشعر وأبوه هو الشيخ زويبن بن بطي المعمري العمري وقد برع أيضًا في الشعر وورثه منه ابنه الشاعر عبد الله، واستطاع أن يثقل موهبته الشعرية من خلال مجالسته للكبار من الشعراء، فكان محبًا للشعر منذ صغره وبدأ في كتابة الشعر منذ أن كان عمره خمسة عشر عاما
اشتهر الشاعر بكتابة الشعر فله الكثير من القصائد في الحكمة والرثاء والوصف والغزل والمدح، وكان من أصغر الشعراء نظمًا لشعر الحكمة وله في الحكمة قصائد كثيرة.
نبدا بقصائد الشاعر
ياعزوتي يابدر مااقرب حضايبـك
على الخطا والصبح حبك نقـازي
نوب تنسينا الشقا فـي عجايبـك
ونوب تولعهـا بليفـة وقـازي
ادناة مايرضيك وأدناة مااغضبـك
تلقط الغلطلـت لقـط الجهـازي
ماهي عداوة يوم اطالبك واضربك
أنته حفيد جدودنا ماانـت نـازي
لاشك انا يابدر ابنصحـك وادبـك
واعطيك عن كل المعاني أجـازي
تلقى فوايدها ليـا خـط شاربـك
بها على كل الوصايـا أمتيـازي
خلك شمالي عند زلـة قرايبـك
وعلى الحقوق الليا نصنك حجازي
لاتذخر المذخور من دون واجبـك
اوف الحقوق اللازمات بنجـازي
للضيف والجيران ليّـن جوانبـك
وبالطيب جاز وبالردى لاتجـازي
احلم على زل رفيقـك وصاحبـك
ادمح خطاهم لاتصيـر انتهـازي
يابـدر والله ماتخونـك مناسبـك
لك منسب طيب وساس عـزازي
أفرح ليا قالوا هاك العود جاذبـك
يصير عندي مفخرة واعتـزازي
*وهذه قصيدة اخرى تعبر عن نفسها
الله من قلـب الليـا منـه ادلـج
لو هو بجو فيـه للنـاس صجـه
يدوي مثل مايدوي الطير بالعـج
مع خايع ماينـدرى ويـن فجـه
ماينتبه للـي ينـادي ليـا سـج
والليا انتبه كن الشبـاري تخجـه
لابد من يـوم بـه الهـم يفـرج
عن كل عين بالسهـر مستلجـه
الله على اللي تو رقمـه يبرمـج
ماصار فيه من المطانيـج رجـه
اسرع من الزورق الليا منه امرج
واسبق من اللي بالاشعه يوجـه
جمس الليا قامت قزوزه تواهـج
ضاعن عريضات الرفارف بعجـه
من نقرة العارض يفج القور فـج
ويخلي الشملـول بيـن الاحجـه
خدٍ تحت مـزن بروقـه تلاعـج
نبته من الوسمي غصونه من اجه
لومابها الا الذيب والطير الابلـج
ناخذ بها عن ضيقة الصدر سجـه
عن مجمع به راعي الحق يفلـج
بعض البشر فرقاااه عمره وحجه
العد تنفـاه الضوامـي الليـا رج
والمـر تنكـاه الكبـود وتزجـه
*وهذه قصيدة مدح في الشيخ عامر ابن لويحق المطيري
الله على اللي نازحـات المشاويـر
جرد السهـال القاسيـة والرمالـي
يشوحهـا ويموحهـا بالتياسـيـر
شوح الرشا المبروم بيـن العيالـي
من جـم بيـر عمقـوه الحفافيـر
مسرمـدٍ تاريـخ عصـره هلالـي
عن ماه يقصر حد شوف النواظيـر
قليل واللـي مـن طـوال المدالـي
وردت عليه ضعون بدو ومضاهيـر
عطشا ولا فوقـه مقـام ومحالـي
وتخالفت بيـن الرجـال الأشاويـر
أحـد يبـى الميـراد وأحـدً يبالـي
وقـامٍ يجـرن الحريـر الغنـاديـر
ويبيـن أطـراف رمـز الجمالـي
وتجاوبن بالصوت ويـن المناعيـر
وقامن يطشـن العبـي والشيالـي
وتوارد وه أثنيـن فيهـم عياطيـر
من صوتهن جاهم طرب وانفعالـي
وتلوه فوق وطيـروا فيـه تطييـر
حرفين ذرفيـن نشاطـن عجالـي
جيـبٍ يعـدي نايفـات الحماريـر
بالعرض يبجدهن ويطلـع عدالـي
من مصنع توريد ما هـو بتصديـر
إلى مضى من فوق عمـر الليالـي
بديه آليا شفتـه يصيبـك بتخديـر
وكشنه آليا شفته يجيك أنداها لـي
مـن قبـل مطـور وزادوه تطويـر
لجـن الريـال يكـون المستحالـي
فكسار له في كل دولـه جماهيـر
ما فيه هرجه لا كن السعر غالـي
أبي آليا هاضت شجون العصافيـر
وشع الصبـاح وجالهـن أجتوالـي
طلبت عـون الله والـي المقاديـر
ونحرتـه الصمـان ديـرة خوالـي
أهل بيوتن يـوم وقـت الخطاطيـر
يقلى بها الضيف القـرى والظلالـي
مثل الجبـال الشامخـات المقاطيـر
يامن بها اللي عن عوانيـه جالـي
وعلى السبايا ينطحـون المغاديـر
ويهاجمـون ويحتمـون التـوالـي
قـومٍ آليـا كـرو وفـرو مدابيـر
علـى المهـار مجـدلات الحبالـي
ارقابهـن للخلـف مثـل البواكيـر
أدبارهـم حرفـة وخطـة قتـالـي
ياما الحقن من قال تكفون يامطيـر
لوإ ن لاصوات الرصاص شتعالـي
أيدينهـم تـورد شبـات البواتـيـر
ومتونهـم تدحـم ركـون الجبالـي
وعيونهم بالهوش توصف على الكير
لها بجمر السمر مضـرب مثالـي
أن ساقم العطفـة لقـومِ مناحيـر
عقب المعانـد واحتكـام الجدالـي
قدامهـم تصغـر كبـار الطوابيـر
ويصير فيهـا زعزعـه وانحلالـي
وأن جالهم دون العوانـي مناويـر
يـدون حتـى بالرسـن والعقالـي
أبـي خيـامٍ بالعمـد والتيـازيـر
مبنيتن للضيـوف سمـح القبالـي
مرفوعتٍ مثـل المـزون المزابيـر
ممسوستن مفروشتـن بالزاوالـي
مفتوحتـن بيبانـهـا للمسايـيـر
وناره لها في كل وقـت اشتعالـي
يردم عليها مـن كبـار الجثاميـر
سمر القرى ماهي مطارق سيالـي
ونجرن آليا حرك تفجر تقـل زيـر
وبيض غريـبٍ شكلهـن بالدلالـي
وحيلن يقلطهـن كرامـه وتقديـر
لبعـد بعيـد وللقريـب المـوالـي
الجود وكـرام الوجيـة المسافيـر
طبع الرجال اللـي يبـون الكمالـي
ما يقبلون النقص والنقص تقصيـر
لو العفـون تسمـي المـر حالـي
الجود صار بـدار والبخـل توفيـر
علـى هدفهـم ركبـوه احتيـالـي
المزن ما ينبـت زهـور ونواويـر
ولا يزي الضميان شـوف الخيالـي
ما ينبت المرعـى ولا ينفـع البيـر
أن كان ماصـب القـراح الزلالـي
الشيخ عامر دون نقصـان بالغيـر
أبن لويحق شيـخ شمـل الهجالـي
عند القبائل حجمه أكبر مـن النيـر
والفعل هو مقياس حجـم الرجالـي
ذكره شهير مع الرجال المشاهيـر
دايـم لذكـره بالمجالـس مجالـي
وأخذت عنه من الشويـب تقاريـر
منيـف عنـه بكـل شـئٍ حكالـي
كنه يفرجنـي علـى فلـم تصويـر
يحيـر التفكيـر مـثـل الخيـالـي
من شأن ربعه ضخر الصعب تصخير
خلا الجبـال دروب مثـل السهالـي
الشامخات اللـي بهـن للصقاقيـر
مصنع ولع لكـن عسيـر المنالـي
شمـر وفجرهـن باللغـام تفجيـر
من شأن تحقيق الهـدف والامالـي
خطٍ تعاقب بـه ضخـام المواطيـر
أعـز مطلـب للبلـد والأهـالـي
وبنى العماير باهضـات المخاسيـر
وراحن هدايا مـا عقبهـن ريالـي
ومن يبذل المجهود في نيت الخيـر
يلقـاه عنـد الله عزيـز الجلالـي
تم الكلام وكـل مـا قلـت تعبيـر
عن ما طرى لي بالبيوت الجزالـي
غرايـبٍ مثـل الذهـب والدنانيـر
مكانهن في مستوى الشعـر عالـي
ون كان ما قرو لهـن الشواعيـر
من نضمهن ريحت فكـري وبالـي
*وهذه قصيدة اخرى مليئة بالاوصاف الجميلة
سقوا سقى الله من مطر كل ناشـي
ربعٍ لهم في منبت القفـر مغبـاش
يتلون درب اللـي لبرقـه تواشـي
كثحه على حد السما تقـل لطـاش
كم مـرة بيـن السفـر والغطاشـي
دكوا على جول المها منه وأنحـاش
وبنوا به اللي مثل روس الدشاشـي
مثل القور ماهن هداريس وعشـاش
لاشافها الجيعـان جـاك متحاشـي
يقلط على بيض المناسف والاكبـاش
وصفر من الصالي لهـن اجتواشـي
يصوك ريح ابهارهن كـل ماغـاش
والتمر والمركـا ودمـث الفراشـي
زل ٍ برومـا لـه مـوزع ونقـاش
ماحسبـوا تـال الشهـر للمعاشـي
ولاسعروا حمل البواخر على الطاش
بالسوق عملتهم ماغيـر المواشـي
اللي من اللي ينبت الغيـث تعتـاش
وإن جـاء بلدهـم زاد ولا قماشـي
وسمعوا ووافاهم بالاخبـار طـراش
ودوا لسوق البيـع فاطـر وحاشـي
والمندرج بالسوق من باق الادبـاش
والطيب سعره صعـب ماهوبلاشـي
فازوبه اللي يدفعون الثمـن كـاش
ماجاب غيب قلوبهـم كـل واشـي
بين القبايل ذكرهم يدهـش ادهـاش
مافض مجلسهـم خطـاة الدفاشـي
اللي يتوع بكلمـة تصطـح الجـاش
همـاز لمـاز هـبـود اريـاشـي
سبـاب نمـام مـراوغ وهــلاش
الليا نصحتـه زاد شـره وطاشـي
انحل امانه وانفـرط تقـل رشـاش
ينبش جثث ناس بها الـدود ماشـي
وسط اللحود اللي توحـش توحـاش
حـرااام فيهـا مايجـوز النقاشـي
جنايز حـدر الثـرى كيـف تنـاش
كل العلـوم الطيبـة فـي تلاشـي
تمضحلت واللي بقي ( طاش ماطاش)
*وهذه قصيدة اجتماعية يتحدث فيها عن موضوع معين في نفسه
لي حاجة عيت تحقـق مـن العـام
عيا يطيب الحـظ لـو قلـت أظنـه
يفـز فـزة غاتـر عقـب مـانـام
جنـه حلـوم مزعجـه وأيقظـنـه
وجدي على تحقيقهـا وجـد صـدام
علـى يديـن بـالـولاء بايعـنـه
وبلاده اللـي ماعرضهـا للاسـوام
وعرش الرئاسة والجيوش المرنـه
اللي قذايفهـا تعـدت ورى الشـام
شاميـر يـوم ولايتـه روعـنـه
وبيوته اللي من سيراميـك ورخـام
خطط وصممهن علـى كيـف فنـه
ماتنتـعـدد تكلفتـهـن بـالارقـام
ماهـو مواطـن عايـدي يبهضنـه
حاكم من الحكـام ويصـدر الخـام
دار السريـة والــدول يدعمـنـه
متريّس له دولـة شعبهـا اقسـام
ويلعب على القسمين شيعه وسنـه
مخلـي ٍ شيخانهـم تقـل خــدام
يمشون خلفه خوف ماهـو محنـه
ملا البيوت مـن الارامـل والايتـام
وملا السجون المظلمـة والمجنـه
ياليـن طشنـه مقـاديـر الايــام
مـن النجـوم النايـفـة نزلـنـه
مثل الوليشة بين عـدوان الاسـلام
من كـل صـوب كلابهـم ينهشنـه
او وجد عـود يرتكـي كـل ماقـام
على كفوف يديه مـن كبـر سنـه
الليا غفل بايامـه الماضيـه هـام
والليا انتبه من غفلته ( جر ونّـه )
من عقب ماهـو للمغاويـر مقـدام
الليـا غـزا صـم الرمـك يتبعنـه
ومروبع يزمـي مثـل عـز لـزام
الليا اقبلن شيـب الغـوارب نصنـه
بظهورهن ربـع كريميـن وحشـام
الليـا جذبهـم صـوت نجـر يدنـه
يجذب له الغايـب وسمـوه عـزام
من كثـر مايجـذب شراريـب بنـه
اليوم كل اللي بقـي جلـد وعظـام
والمال خمس اشياه والبيـت عنـه
ولاله عيال ينصرونه الليـا انظـام
الا بنـات ٍ بالهضاااايـب شـونـه
ياقلـب خلـك للروابـع والاوهـام
رفيـق درب وكـل هــم ٍ تبـنـه
والا انتفض واربط محقـاك بحـزام
وعن قوم ( وش سويت ) خافيك كنه
والشر عنك خـلاف والخيـر قـدام
والصبر في وقـت المعانـاة سنـه
*وهذه قصيدة غزلية
إن كان تنشد عن علومي وأنا صبي
ابتذكـرهـا واعلـمـك عـنـهـا
لو هي بصفحات ٍ طواها الزمن طي
جرة مطر جاهـا عجـاج ودفنهـا
ألعب طواريق الهوى مع هل الغـي
اثقـل المعنـى واخفـف لحنـهـا
والشعر يبقى في قلوب العرب حـي
ولا كل من سوى القصيـدة تكنهـا
وأنا حداها حدي الاصعـاب بعصـي
واقودهـا قـود الاديـب برسنهـا
والحب مردوده على صاحبـه سـي
كم ضحكـة ونَـات قلبـي ثمنهـا
أذكر سنة تسعه وتسعيـن هجـري
الـف وثلاثميـة بدايـة زمنـهـا
زلت بي الاقدام للشمس مـن فـيَ
اقـدار والاقـدار تومـر وتنهـى ّّ
غافل وجتني من كوت خافقي كـي
كية عطـب لـولا طبيـب مكنهـا
أبعدت مضربها عن الصـدر بيـدي
ولدَت على كبـدي برمـح طعنهـا
وعرفت ماتخفيه في صدرهـا لـي
من واقع النظـرات منـي ومنهـا
نظرت فيهـا مثـل نظراتهـا فـي
وعجزت اقاومهـا وصديـت عنهـا
كل النساء ظلماء وهي بينهن ضـي
غطت شعاع الشمس أشعـة بدنهـا
من الذهب تلبـس خلاخيـل وحلـي
سـود محاجرهـا وحمـر وجنهـا
مدري تسمى من ومنين ومـن أي
وش هي قبيلتهـا وموقـع سكنهـا
راحت وانا مااعرف من اخبارها شي
الا رمـوز الموتـر اللـي حضنهـا
مدينة من بيـن ابـو ظبـي ودبـي
لعلهـا كاننـهـا هــي وطنـهـا
تمطر عليها السحب هـذي ورى ذي
وديـم الليـا قفـى تراهـا ودنهـا
*قصيدة الشاعر عبدالله بن زويبن مزاين 1425ه
راكب اللي والنجـوم اللامعاتـي
في سماهن والصباح يشع ضيه
بين حي الجامعة والمرسلاتـي
واستدار امع الخطوط الدايريـة
ما التفت راعيه يـم اللافتاتـي
حافظ كـل الخطـوط الريسيـة
أول أسمه بالثـلاث المفرداتـي
رقم خمسة بالحروف الأبجديـة
تـو لوحاتـه عليـه مركباتـي
صادرات من مـرور الناصريـة
وارد تـوه حديـث مواصفاتـي
يلتهـب بديـه ويلمـع داخليـه
كن طبلونـه جهـاز مراقباتـي
في حدى المستشفيات المركزية
شاشة لنباتهـا مثـل السفاتـي
للدمـاغ مخصصـة والباطنيـة
تنكشف به بالضروف الطارياتي
دقة القلـب السريعـة والبطيـة
وكشنه الداخل زلـول ناعماتـي
قبتـه وارضيتـه والجانبـيـة
والمراتب من جلود الزاحفاتـي
ماآدري هو جلد داب أو جلد حية
ماقطعت الشك ميـر مموهاتـي
مثل تمويـه البـدال العسكريـة
بديه أدهم والخطـوط مذهباتـي
مثل عقد الماس في عنق الفتية
والزوايا والركـون مصفحاتـي
مايله والواجهـه مثـل الخليـة
بين شمعات صغـار مربعاتـي
والعلامـة وردة فـي مزهريـة
يوم مريت العيـون الساهراتـي
قوةٍ للأمن في حجـم السريـة
قبل ما آقف عندهم واطلع اثباتي
صفو العسكر ودقوا لـه تحيـة
مشترينـه للديـار النازحاتـي
والخطوط المتعبـات السرمديـة
الطوال اللـي تشـق النايفاتـي
باتـلات مثـل بطـن البندقيـة
ماتخاويـه الريـاح الذارياتـي
والوحش والطايرات المروحيـة
كن له جنحان مثـل الطايراتـي
يرفعنه فـوق مـدري جاذبيـة
وكن ماله من خلاف مساعداتي
قوة الماطـور ترفـع مقدميـة
وان عطيت ابه الفجوج الخالياتي
فزته تعطيـك عـزم ومعنويـة
ماوقف يطبـخ بلوفـه ذايباتـي
والشراب مغلـق مـن تانكيـة
وإن نظر راعيه مع كل الجهاتي
مايشوف الا الخلا والمهمهيـة
للسراب وللمعاصيـر اعتماتـي
عبلةٍ جردا وشمـسٍ صنقريـة
وأيس المسكين من تالي الحياتي
وأرتكى فوق الكفر يكتب وصية
كن جَلده جَلد خيـل هاجماتـي
? أول الغارة فرس شيخ الغزية
أن هجم قدم السبـاق الأولاتـي
يشتبك هو والعدا فـوق العبيـة
وان رجع يثني خلاف التالياتـي
يقهر السبـق ويرجـع للرديـة
وإن كسب حم الذرا والمسرجاتي
مايخيب ضن من قـال الحذيـة
غازيٍ يبغى النقى قبل الفواتـي
غاديٍ له عند عدوانـه شفيـة
أزعجنـه بالصيـاح الناعياتـي
كل ما نادى المنادي في سميـه
أتعجـب بالعلـوم الماضياتـي
وألتفت في موتري واذكر مزيـة
مع جراديح الحـزوم النابياتـي
كن حذفه للحصى حذف أهوشية
لا وطى له مروةٍ راحت شتاتـي
كل قطعة طيرت مثـل الشضيـة
يم حايل من شمـال امغرزاتـي
ماقصد غير الطهيمي في مجيـة
ناصٍ عليان في موضوع ذاتـي
مايسـده واحـدٍ مابـه حميـة
ما يسده غيـر راع الواجباتـي
يوم ولد اللاش يبخل في طليـة
والدلال الصفـر دايـم والماتـي
من قديم الوقت راعي شاذليـة
والعشاء كثر الضيوف امفطحاتي
كل واحد له ذبيحة فـي صينيـة
كنس ماهن مـن المستورداتـي
ما يجيب البربـري والساكنيـة
ما يجيب الا السمان الغالياتـي
يتخير فـي نجـد نجـد العذيـة
بين حايل والقصيـم مربعاتـي
بالفياض اللي مناضرهـا بهيـة
من بعد سيل الوسوم مسيلاتـي
مرتين امن المـزون العقربيـة
أول النـاوة سيـولٍ جارحاتـي
وآخر الناوة قرى صمد وشغيـة
الزهور اللي على روس النباتي
يشبعن إبها الضحى وأرضٍ مرية
ما تثنن بالمـراح مهوجراتـي
ولا عطوهن من علاج البيطرية
والمداخـن بينهـم متعاقباتـي
كل وحدة راسهـا ياخـذ أوقيـة
ما قطع فيهن عطور السيداتـي
ريحة المعمول ولـى الجاونيـة
مايخلي نافذه لأهـل الشماتـي
جعـل مايبقـى لتاليهـم بقيـة
وله عوايد بالعطايا المعجزاتـي
الجيوب الشهب يعطيهـا هديـة
ومن بغى يزعل من العلم الثباتي
ما عليَه منـه والله مـا عليـه
إن زعل يرد البحور المالحاتـي
إن رضي ولى إيبنط في طميـة
يا ولد راشد بـدون مجاملاتـي
حايزٍ كـل المزايـا الجوهريـة
*وهذه تعبر عن نفسها
يامل عيـن لهـا يوميـن زعلانـه
ومن الزعل نومها ماهـي أباغيتـه
من كلمة يوم جتنـي مالهـا خانـه
مدري لها قصد وإلا بـس تفويتـه
ياليت بعض الاوادم يقطـع لسانـه
الخبل يزعجك مير إن جاك وإن جيته
الخبل لاتنشده لو هو عـن اخوانـه
لاتنشد الخبـل ثـم تـدق ساقيتـه
واللي ورى التايهه يغويه شيطانـه
ويجنب اللازمه لو جـات ناصيتـه
لأدناة حاجة يجيك يشيـل محجانـه
أشجع من الكلب عند أطناب راعيته
خله لعـل الكـوارث بيـن حجانـه
ويطيح في واحـد ويفـش عافيتـه
من غرب ماهومن اصحابه وجيرانه
والااقرب الناس طابختـه وشاويتـه
وضعيف النفس لو تعطيـه رمانـه
حطك مثـل واحـد يحييـه ويميتـه
بديت بإسم اللي يلبـي نـدا الـداع
للمستجير ابواب عفـوه اوساعـي
تسجد له الروس العزيـزه تخضـاع
في حاجته حتى الغنـي والشجاعـي
متكفلن بالـرزق ماشالـت القـاع
لولاه كل النـاس عـري وجياعـي
وهاضن هجوسي وأستعدن للإبـداع
لإبـن محيـا يكشفـن إنطبـاعـي
عن طبع محمود السجايا والاطبـاع
ربيـع جـلاب الثنـي والربـاعـي
بغيت ازوره لكـن الوقـت ماطـاع
ماهي برغبـة صدتـي وأمتناعـي
وجهزت جيـب للمسافـات قطـاع
يطوي خرايم نجد طـوي الشراعـي
آخر موديل ولونه أبيـض ولمـاع
مثل القزاز اللي يعكـس الشعاعـي
فيه الغرايـب والعجايـب بالانـواع
لعيون راع الـذوق قمـة متاعـي
سواقه اللي من سنيـن الترعـراع
ماتاه مع درب الجهـل والضياعـي
ماذاق شي مـن التـرف والتـدلاع
على التعب والهـم يرقـد وياعـي
وضعه مع الدنيا معانـاة وصـراع
وقسوة ماهو بحوار عشب ورضاعي
نومه الليـا منـه نوالـه بمرمـاع
غفوات شـاوي ٍ تحفـوه سباعـي
يكفيه نصف اليوم روحه ومرجـاع
روحه ومرجاع وسـلام ووداعـي
يوصل سلامي وافي الشبر والبـاع
عفاس بن تركي طويـل الذراعـي
بالمنزل اللي من نشد عنه ماضـاع
من دون اجـا متبينـن بالرفاعـي
عالي وبيبانه على الطـرق شـراع
ملفا الحمايل من جميـع البقاعـي
طبيعتـه ماهـي نفـاق وتصنـاع
ولاهي جديـدة مبتدعهـا إبتداعـي
نبت بها نبـت الاظافـر بالاصبـاع
ورثه وزودهـا الطمـوح أندفاعـي
ماسام في سوق الخسـارة ولابـاع
ماهو بعير ٍ كـل ماسيـق طاعـي
ولاهو بغصن ٍ كل ماهـب ذعـذاع
من يوم يوميبه سريـع انهزاعـي
بالمعرفـة وافـي وبالـراي بتـاع
كل المراجل فيـه حسـب اطلاعـي
وسمعه لعذبـات التماثيـل ينصـاع
رجل يحـب المرجلـه وأجتماعـي
والليا نخي راعي حميـة ومفـزاع
ماهو بـراع إماطلـة وأنجضاعـي
ماهو بثلج ٍ كل ماجا الضحى مـاع
ولاهو سراب ٍ يطـرد لـه بقاعـي
أقولهـا ماهـي محابـاه وخـداع
والشك مايلحـق حميـد المساعـي
حفيـد شيخانـن يفكـون الاقطـاع
يثنون دون اللـي جنبهـا زعاعـي
الليا تناخم واسرجـم كـل مطـواع
ارواحهـم بالسـوم الاول تبـاعـي
يخضبون اللي مضاربهـن وسـاع
من دم شرسين اللغـا والصراعـي
يفـرح بهـم ذود ٍ تقفـاه طـمـاع
في خلوتن ماعندهـا غيـر راعـي
الليا اقبلوا قلبه من الخـوف ينـلاع
ويصير هوشه دون نفسـه دفاعـي
بالوقت الاول قبل تغييـر الاوضـاع
وقت العـداوة والشقـا والنزاعـي
استدركـوه مغمـدة كـل قـضـاع
السيـف بـدل بالقلـم واليراعـي
وتعادلت روس المناكـب والاكـواع
في ظلهم حتـى الثعالـب شباعـي
وختامها صلوا علـى خيـر شفـاع
وأخير من نـادى للاسـلام داعـي
باخر بيوت من ورى حدب الاضلاع
راجن وماجن وأرجلـن بإندلاعـي
وانا الليا غنيـت متعـت الاسمـاع
وخليت راع الصنف يشعاه شاعـي
